LEGAZPI CITY – Lifted na an deadline kan Civil Service Commission (CSC) sa mga miyembro kan Sanggunian Bayan, Panlungsod asin Panlalawigan siring kan mga konsehal, board members, kasabay an mga bise-alkalde asin bise-gobernador para sa special eligibility.
Ini an sinabi ni Chairperson Atty. Karlo Nograles kan CSC sa press conference katakod kan inagurasyon asin blessing kan Computerized Examination (COMEX) Room kan ahensya.
Segun kay Nograles, kun matapos an anom na taon na pagsirbi, kasabay an 72 units o siyam na taon asin nagtapos sa kolehiyo, pwedesir na sindang matawan nin 1st level o sub-professional asin 2nd level o professional eligibility kan CSC.
Sinabi niya, magin an barangay level, pwedesir man matawan nin sub-pro eligibility alagad sundo sana sa SK Chairman.
Pighahalat na sana ninda an resolution na makasabay man an SK members para sa sub-pro.
Tinawan-doon man kaini, piggigibo ninda an gabos na paagi nganing matawan nin pagkakataong makapagtrabaho sa gobyerno an mga nagsirbi sa sangguniang nin huli ta gusto nindang magdakol an civil servants sa nasyon.