LEGAZPI CITY – Piglatag na kan gobyerno probinsyal kan Albay an nagkapirang mga aktibidad katakod kan pagbisita kan delegado kan European Union (EU) sa probinsya.
Ngunyan na aldaw, piglalaoman na mapasiring na sa probinsya si European Union Ambassador Luc Veron asin makipag-olay sa gobernador kan Albay.
Piglalaoman na mapartisipar sa nasambit na pagtiripon an nagkapirang mga opisyal gikan sa sektor kan agrikultura asin kalakalan.
Bibisitahon ni Veron asin personal niyang mahiling an cultural asin heritage sites sa Albay, kaibahan an Cagsawa Ruins, Cagsawa National Museum, asin iba pang lugar kun sain pwedesir mahiling an Bulkang Mayon.
Kun magigirumduman, an pili nuts na saro sa mga bistado sa probinsya, pinoonan nang i-export sa European Union.
Piglalaoman na saro ini sa mga magiging tema asin kun ano an posibleng mabilog na kasunduan nganing mas mapalawig pa ini sa mga European countries.
Huli kaini, mas dakol na investment asin oportunidad para sa probinsya an piglalaoman na magigin resulta sa gigibuhong pagbisita kan nasambit na delegado.