Wala sang nag-withdraw ukon may nagbawi sang ila pirma para sa ginaduso nga People’s Initiative.
Ini ang ginkumpirma ni Atty. Will Arceño, Provincial Election Supervisor sang ma-interview sang Brigada News FM Roxas City.
Suno kay Arceño, wala sa gihapon sila sang nabalhag nga may nag-withdraw ukon nagbawi sang pirma sa bahin sang Segundo Distrito.
Ginpahayag ni Arceño, nga libre kag available na ang withdrawal form sa ila nga opisina.
Matandaan, temporaryo nga ginpauntat sang Comelec ang pagbaton sang pirma sang pumuluyo bangud madamo sang palamangkutanon kag sitwasyon nga kinahanglan i-address.
Ginhimo ini agud malikawan ang problema, kinagamo kag indi pag-intindihanay sa interpretasyon sang probisyon sang mga rules.
Nahibaluan nga yara sa masobra 40,000 nga mga pirma ang natipon sang Comelec nagikan sa nagkalain-lain nga kabanwahan.
Apang ila pa ini nga i-verify bangud madamo sila sang nakita nga pirma sang proxy kag indi matuod nga pirma sang tag-iya sang ngalan. | Judy Ann Juare