Nagpahayag sang nagkalain-lain nga reaksyon ang mga pumuluyo sa syudad sang Roxas natuhoy sa mga ordinansa nga ginapatuman sa pagpanguna mismo ni Mayor Ronnie Dadivas.
Para sa malinong, matahum, kag matinlo nga siyudad, pasangkaron ang pagpangdakop sa mga taglapas sang masunod nga mga ordinansa:
City Ordinance No. 066-2022 – Smoke-free and Vape-free Ordinance
City Ordinance No. 045-2022 – Baybayon ko, Limpyohan ko Ordinance
City Ordinance No. 079-2022 – Comprehensive Anti-Littering and Anti-Dumping Ordinance
City Ordinance No. 042-2002 – Traffic Code of Roxas City
Sa interview sang Brigada News FM kay Zanjoe, ginpahayag sini nga pabor siya sa pag-implementar sang nasambit nga mga ordinansa agud madisiplina man ang mga tawo.
Apang suno dire, dapat kinahanglan anay nga ipahibalo sa mga pumuluyo kag indi pag-gulpihon sa pag-implementar kay makaluluoy man ang mga tawo nga wala nakahibalo.
Suno naman kay Toto Aman, isa ka tricycle driver mas maayo gid kun ipatuman ini nga ordinansa ilabi na sa mga nagapanigarilyo kag ginpahayag man sini nga dapat tayuyon ang pagpangdakop kay sang nagliligad nga tinuig na implementar na ang amo nga ordinansa apang wala naabtan sang isa ka bulan nadula na.
Nagpanugyan man ini sa mga katapo sang CORE nga dapat mangin patas sila sa tanan nga pumuluyo nga ila madakpan kag dapat paduyunon na ang pagpatuman kay para man ini sa kaayuhan sang tanan. | Judy Ann Juare