Nagpahayag sang reaksyon ang pila ka mga pumuluyo sa syudad sang Roxas natuhoy sa kontrobersyal nga issue sa pagpaidalom sa drug test sang mga magakandidato sa Barangay and Sanguniang Kabataan Elections 2023.
Sa interview sang Brigada News FM kay Jojo, residente sang Brgy. Lanot, ginpahayag sini nga nakadependi na sa mga magapadalagan kun sila ang magpa-test kag kun gina-required sang Comelec mas maayo nga magsunod sila kag pabor gid siya dire.
Suno naman kay Joseph sang Brgy. Banica, Roxas City, ginpahayag sini nga mas maayo nga magpaidalom sa drug test ang magakandidato agud mahibaluan kun sila ang nagagamit sang droga kag agud maibanan ang mga buwaya sa barangay.
Ginpahayag naman ni Kim nga mas maayo nga magpaidalom sa drug test ang mga kandidato sa BSKE agud mahibaluan kun eligible sila nga mangin miyembro sang konseho.
Matandaan, nga sang damlag lang nagpaguwa ang Police Provincial Office 6 sang impormasyon nga may yara sang mga barangay officials ang ginaalegar imbolbado sa iligal nga droga ini matapos nga ginbuyagyag ni PNP Chief PGen Benjamin Acorda Jr. nga madamo sa Western Visayas.
Naglab-ot sa 76 ka barangay officials ang namonitor sa diin 20 ka punong barangay kag 56 ka kagawad ang naaresto, nagsungka kag padayon nga ginamonitor.
Apang, ginpanindugan naman sang Comelec nga wala malakip sa kuwalipikasyon ukon rekisitos ang drug test sa tion nga magfile sang certificate of candidacy ang magapadalagan sa Barangay kag SK election bangud ini ang wala sa layi. | Judy Ann Juare