Patay na sang nasapwan ang 51-anyos nga mister matapos ginaalegar gin-atake sang iya balatian nga epilepsy samtang nagapanguha sang bagungon sa Brgy. Tanza Sur, Panay, Capiz.
Ginkilala ang napatay kay Jose Ricky Mansilla, residente sang nasambit nga barangay.
Sandig sa imbestigasyon sang Panay Municipal Police Station, nasapwan nalang ni Darwin Dumapit, 29-anyos ang iya ugangan nga nagakulob kag wala na sang kabuhi sa kanipaan nga yara nahamtang sa higad sang suba.
Nagapati ang pamilya nga gin-atake sang iya balatian ang biktima kag posible nahulog sa tubig kag nalumos. Sa karon, yara na ang bangkay sini sa isa ka punerarya sa nasambit nga banwa. | Judy Ann Juare