TUNGA ang reaksyon sa pipila ka miyembro sa Pantawid Pamilyang Pilipino Program o mas giila sa tawag nga 4Ps. Matud ni Larry Lopez, 33-anyos, traysikel drayber ug taga Barangay Dadiangas West, GenSan ug dugay nang miyembro sa 4Ps.
Mosunod sila sa kung unsa man ang mandu sa gobyerno aron protektahan ang iyang mga anak batok sa virus. Sa bahin ni Jessica Macasucol, vendor, taga Barangay Dadiangas West nahadlok sa mga nadungog nga dili maayong epekto sa Covid-19 vaccine. Sama na lang sa pagkahimong miyembro sa 666 o antichrist ug mahimong ‘zombie’.
Apan kung kinahanglan nga magpabakuna aron dili maundang ang ayuda sa gobyerno mosunod sumala pa kini. Sukwahik usab ang panglantaw sa mister niini nga si Faustino, dili angayang himoong kondisyon sa gobyerno ang pagpabakuna.
Tungod wala pa ang pandemya naa na ang programa nga naghatag og ayuda sa mga benepisyaryo. Butyag usab ni Restituo Macuto, director sa Department of Social Welfare and Development (DSWD) 12 gitun-an nila. Kauban ang Department of Interior and Local Government (DILG) sa rehiyon kung paunsa ipatuman ugaling ang polisiya.
Apan kasamtangan naghulat usab sila og mandu gikan sa central office kalabut sa ‘No vaccine, No subsidy’ policy nga giduso. Una nang, gibutyag sa Malakanyang nga kinahanglan og ‘amendments’ sa balaud ang kondisyon sa paghatag og subsidy. Ang 4Ps ang namugna ilawom sa Republic No. 11310 kini ang ayuda nga naa sa P3,000 sa eligible poor households. Duna sumala pay 4 million benepisyaryo ang programa apan sagad kanila ang wala pa nakadawat og COVID-19 vaccines. ( Richel Gubalani)