LEGAZPI CITY – Epektibo ngunyan na aldaw an pagpapautob kan modular/online classes sa pribado asin pampublikong mga eskwelahan sa banwaan kan Libon durante sa nanutarang halangkaw na heat index susog sa ipinaluwas na abiso kan Municipal Disaster Risk Reduction and Management Office (MDRRMO).
Kun magigirumduman, enot naman nagbaba nin abiso an MDRRMO kan banwaan, kun sain nakapalaog an pagtugot sa mga estudyante na magsulot ki komportable alagad disenteng bado nganing maibetaran an anuman na suffocation dara kan namamateang init nin panahon.
Apwera digdi, magin an Bicol University, nagbaba man ki kaparehong abiso, alagad dai sana limitado para sa mga estudyante kundi sakop man kaini an mga personahe kan unibersidad.
Mientrastanto, an mga otoridad padagos man minapagirumdom sa publiko na magin alerto asin mag-ingat sa mga heat-related illnesses dara kan alangkaw na heat index ngunyan na hot and dry season.