GIPATAWAG sa SP Gensan ang mga representante sa delivery online platforms ug ilang mga riders alang sa consultative meeting may kalabotan sa mga molo nga dapat makaangkon og health and accident insurance, Philhealth, SSS ug uban pa nga mga benepisyo ang mga riders.
Gipamahayag ni Councilor Odyok Acharon, chairman sa Committee on Labor nga ang maong panagtigom ang unang hugna palang tungod kay daghan pa og mga ipahigayon nga susamang lakang hangtod sa mga committee hearings alang sa pagpanday og ordinansa.
Segon ni Acharon nga gikinahanglan madungog ang tingog sa matag usa kalabot sa maong isyu aron nga makamugna og win-win solution sa ginapangayo sa mga riders nga insentibo.
Samtang sa bahin sa mga riders gipamahayag ni Modesto Sanches nga nakuntento sila ug positibo sa gipahigayon nga meeting tungod kay gidungog ang ilang mga molo.
Gumikan sa maong katikaran, segon ni Sanchez nga nagapasalamat sila nga gipaminawan sa lokal nga mga opisyal ang ilang tingog aron nga mahatagan og kasulbaran ang ilang ginahangyo.
Nagalaum nalang usab ang nahisgotan nga mahatag sa delivery online platforms ang kon unsa ang alang kanila.
Samtang gisulayan sa Brigada News Team nga kuhaan og ilang bahin ang representante sa Food panda ug Grab pagkahuman sa maong meeting apan nagdumili ang mga nahisgotan nga moluwat ug pamahayag. I Danny Casi