Nagaabot eon sa 23 ro kaso it motor riding suspect sa Aklan umpisa 2004 hasta November 2023.
Raya ro ginpresenta sa ginpatigayun nga legislative inquiry ku Martes it Sangguniang Panlalawigan nga ginpangunahan it Committee on Peace and Order and Public Safety ag Committee on Laws, Rules and Ordinances.
Sa interview it BRIGADA NEWS FM KALIBO kay SP Member Nemesio Neron, sa 23 ka mga kaso, sa 40 porsyento eon kara ro na-solve.
Naga inabo segun ro kremin nga imbolbado ro motor riding suspect bangud mabaskug ro andang buot bangud sayud nanda nga malisdan sanda nga kilaeahon bangud sa suksok nanda nga helmet, dugang pa kara nga nahadlok man magsugid ro ibang witness sa insidente bangud basi balikan ro mga raya.
Umapela man si SP Neron sa mga law enforcement agencies sa Aklan nga dugangan pa ro pagiging agresibo para mahadlok ro pilang katawo nga maghimo it kremin.
Gin engganyo man ro mga LGUs nga magpasa it laye nga kung pwede hay i-regulate ro pagsuksok it helmet nga kung mahimo hay buksan raya kung sa populated area para makita ro itsura it motorista, ag kunta segun hay makaangkon man it high definition it mga CCTV.
Tiempo man segun suno kay SP Neron nga magbueoligan ro tanan, ro kapulisan ag komunidad para mahadlok ro mga naga plano it maeain ag para malikawan ro anumang kinagamo. // ANN DESLENE SALAZAR