Naligsan-patay ang usa ka motorista sa usa ka bus diha sa Poblacion, Tagoloan, Misamis Oriental.
Giila ang biktima nga si Ramil Fabriga Abanes, usa matud pa ka security guard, 36 anyos, mulopyo sa Zone 10, Upper Brgy. Balulang ning syudad sa Cagayan de Oro.
Samtang naila ang driver sa bus nga si Clifford Sicuyas Vios taga Lala, Lanao del Norte.
Sigun sa imbestigasyon sa Tagoloan Municipal Police Station, nagsubay sa parehong direksyon sa dalan ang bus ug ang motorsiklo.
Diin parehong gikan ang duha ka vehikulo sa east ug padulong sa west side, apan pag-abot sa daan nga tulay sa may Tagoloan misulay sa pag-overtake ang motorsiklo sa left side sa maong bus apan na-overshoot kini sa gutter, hinungdan nga nasimplang o natumba ang maong motor nga maoy hinungdan nga nalatayan kini sa ligid sa bus.
Daling gidala sa hospital ang motorsista, apan gi-deklarang dead-on-arrival.
Nasayran nga nakuhaan pa og video sa nagsunod nga usa ka pribadong sakyanan ang tibuok nga panghitabo.
Sa karon naka-kustodiya sa Tagoloan MPS ang driver sa bus ug takdang pasakahan sa tukmang kaso.