BICOL – Ipinapaisi ngunyan kan Deparment of Social Welfare and Development o DSWD sa Bicol na temporamenteng ipiglipat an nagkapirang mga units kan ahensya.
Sa saindang public advisory, puon pa kan Hulyo a-dose, an saindang Policy and Plans Division kasabay an Standards Units asin Policy Development and Planning Section; Disaster Response Management Division; Lead Secretariat pati na an Office of the Regional Director kasabay an Social Marketing, Legal asin Social Technology Unit iyo an nasa bago nang oficina kaini sa Training 1 & 2 Ground floor Bldg. 10 (Sutherland), Embarcadero de Legazpi, Legazpi Port Distrcit sa ciudad nin Legazpi.
Magtitiner an mga nasabing mga units sa bago kaining lokasyon hasta s amagpaluwas nin bagong anunsyo an oficina.
Mantang nag abot na sa nueve sientos otsenta y cuatrong benepisyaryo an natawan nin tabang puon Hulyo katorse hasta dyes y sais, taon dos mil bente uno sa lindong kan Emergency Shelter Assistance o ESA asin Cash-For-Work o CFW kan DSWD-Bicol na obhetong matawan an mga benepisyaryo nin tabang -pinansyal na magagamit sa pagpapakarhay kan mga naraot na harong dara kan mga nag aging bagyo asin iba pang kalamidad.
Sa dugang na bareta nagbisita sa rehiyon si National Household Targeting Office (NHTO) Director Justin Batocabe kasabay si Cong. Alfredo Garbin kan AKB, tanganing mag-courtesy call kay DSW-Bicol Regional Director Leo Quintilla.
Sa saiyang mensahe, tinawan duon ni Dir. Batocabe an importansya kan pagkakaigwa nin Listahanan program para sa marikas na identipikar kan mga tios sa sociedad.
Personal man na ipinaaram ni Cong. Garbin an saiyang mga suhestyon asin nagpromesa nin bilog na suporta sa anuman na programa o proyekto na ilalansar kan ahensya para sa mga kababayan na Bicolano.