LEGAZPI CITY – Nagtutubod an National Bureau of Investigation (NBI) Bicol na hasta ngunyan, may mga pulitiko asin kontraktor na nagtataong suporta sa Conception Criminal Gang sa Albay.
Ini an sinabi ni Atty. Felipe Jimenez, Jr., Agent on Case kan NBI Bicol sa sarong pahayag.
Segun saiya, an grupong ini, igwa nin political connections asin sinusuportaran man sinda kan nagkapirang kontraktor.
Dugang pa kaini, may mga nagtataong badil asin kwarta sa grupo asin kun kinakaipohan nindang magtago, pulitiko man su boot an nagtatao ki mapagtataguan.
Napag-araman na maabot na sa 80 katawo an na-recruit kan Conception puon kan nakalihis na eleksyon.
Sa ngunyan, nagpapadagos pa an operasyon kan NBI sa paghanap sa mga natatadang miyembros kan grupo.
Pangapodan ni Jimenez sa mga pulitiko sa probinsya, makipagtabangan na asin dae na pagsuportaran an grupo tanganing matapos na problemang may kinaraman sa krimen na kinaiimbweltuhan kan mga ini.