BICOL—Tinawan linaw kan San Andres Municipal Police Station sa Catanduanes na bakong problema sa modules ang rason kan suboot pulbar na pagpapakagadan kan sarong 23-anyos na lalaki sa Brgy. Bislig nasambit na banwaan. Segun ki PLt. Marissa Macabero, mentally ill o may kakundian sa pag-iisip an nasabing biktima asin may mga pagkakataon na nagiging bayolente ini basado sa testamiyento kan mismong kapitan nin barangay.
Dae naman suboot iniyo nag mo-modules kaya imposibleng ini ang rason ka pag pulbar kaining kuanon an sadiring buhay, kontradiksiyon sa mga nagkairinot asin naglakop na iri-istoryang huli sa pigsisimbagang modules ang kawsa nin tangkang paghugot kaini. Naidalagan man tulos ang biktima sa hospital asin natawan nin medikal na atensiyon.
Mientrastanto, nagpapadagos man ngunyan ang imbestigasyon kan pulisya sa sarong 16-anyos na daraga gikan sa kaparehong banwaan na na nagpulbar mang mag hugot huli man giraray sa modules. Sa ngunyan, dae pa ini pwedeng kumpirmaron kan pulisya nin huli ta presente pang pigtatawan nin atensiyong medikal an biktima asin kinakaipuhan pang isairarom sa CT Scan huli sa tigsapar kaining danyos sa saiyang payo. Mayo man suboot naresibing pormal na report an saindang hepatura gikan sa pamilya kaini kaya padagos sindang nakikipag uron sa mga partidaryos kan daragita para ma resolba an kaso.
Marurumduman na inot namang sinabi ni DepEd Bicol Regional Dir. Gilbert Sadsad na kadakul aspetong nakakaapekto sa sarong indibidwal o estudyante para magpulbar ining tapuson an sadiring buhay kaya dae pwedeng ibasol sa modules asin makabagong sistema nin pag-adal an mga naibabaretang paghugot kan mga estudyante.
Pagirumdom kan mga eksperto sa salud asin sikolohikal na urulay, sa mga taong nag-aagi sa mga siring na pagbalo, dae suboot ini pararumon asin maghagad nin tabang sa pamilya, mga barkada asin eksperto para dae maghantong sa mga siring na insidente. -30-