Nagkutoy ang tiyan nga nisurender ang pito ka mga sakop sa New People’s Army (NPA) ug Milisya ng Bayan (MB) diha sa 30th Infantry (Fight On) Battalion, Philippine Army sa nakalabay’ng adlaw.
Ang nisurender naglangkob nila alyas Jerson, nagsilbing pangabaga sa kumander; alyas Daylan, nagsilbing Political Guide; alyas Gelai; alyas JimJim; alyas Robert ug duha ka sakop sa MB nga sila alyas Remon ug alyas Bernie pulos sakop sa Guerilla Front16 C1 sa North Eastern Mindanao Regional Committee.
Sumala ni alyas Jerson, sukad pagsampa sa kalihokan hangtod nisurender, wala sila nakatagamtam sa haruhay nga kinabuhi, hinoon, mas nisamot pa ang kapait nga ilang nasinatian labi na nga kanunay lang kini mapasmo, lapoy ang lawas sa binaktasay, ug subrang kamingaw sa pamilya.
Dala sa mga nahisgotan pagsurender ang 1 ka 40mm Grenade Launcher, 1 ka Cal. 30 M1 Garand Rifle, 1 ka 9mm Submachine Gun, 2 ka magazines sa AK47, (7) clips, 53 ka mga bala sa Cal. 30, 1 ka Anti-Personnel Mines, ug 28 inches nga electrical wire panggama og bomba.
Gitug-an usab sa mga nahisgotan ang tinagoang armas ug nakuha nila ang 2 ka Ak-47 nga gilubong sa Sitio Tagbak, lungsod sa Carasscal, Surigao del Sur.
30th IB PA