LEGAZPI CITY – Hinabonan an sarong negosyante sa Daraga makalihis laogon kan suspek an tindahan kaini sa Refreshment Stall, Cagsawa Pasalubong Center, Purok 5, Brgy. Busay kan nasambit na banwaan.
Segun sa report, tulos nagpasiring sa lugar an mga personahe kan pulisya makalihis i-report kan biktimang si alyas “Johanna”, 53 anyos kan Brgy. Sipi an insidente.
Sa kinondusir na imbestigasyon, nahiling sa CCTV footage na binuksan kan suspek an roll up nin stall gamit an spare key asin kinua an coin box na naglalaog nin kantidad poko mas o menos PHP11,000.
Nakua pa kan suspek an kita hale sa mga nabakal na bado na nagkakantidad PHP10,000 asin nakabugtak sa bag pati man an PHP5,000 na kita na nakabugtak sa cash register.
Sa kabilugan, nasa labi PHP25,000 an tinangay kan suspek sa laog kan tindahan.
Mientras, an insidente nahiling mismo kan sarong babaye na residente kan Brgy. Baybay, Tiwi kaya nabisto an suspek.
Sa ngunyan, pigpepreparar na kan pulisya an kasong isasangat saiya sa paagi nin regular filing.