Kapin sa P12,000 nga cash ro natakaw it suspek halin sa sangka negosyante iya sa banwa it Kalibo kaina it agahun.
Ginkilaea ro negosyanteng si Peter Masongsong ag may pwestu sa may Oyo Torong St., sa banwa it Kalibo.
Sa interview sa negosyante, nagpaeapit kana kaina it kaaganhun ro suspek nga sangka babaye, nabdus ag may cleft palate para bumakae it panghanda sa birthday.
Samtang masako segun si Masongsong sa paglista it pinamakae it suspek hay owa nana napan-uhan nga tinakawan eon gali imaw.
Gulpi eon lang segun naghambae ro suspek nga balikan kara ro anang ginpamakae bangud boe-on anay nana ro anang saeakyan nga naka-park.
Samtang ginahueat ro suspek hay ginbuoe it negosyante ro anang bag nga may sueod nga P20k ag dikara eon nana nadiskubrehan nga naduea eon ro anang P12k, ngani ginpakamayad nana nga magreport sa Kalibo MPS.
Sa ginkasa nga hot pursuit operation hay nadakpan ro suspek sa may Kalibo Public Market.
Positibo nga ginkilaea ni Masongsong ro suspek ag pursigidong kasuhan raya agud indi eon makapang biktima pa. // ANN DESLENE SALAZAR