NorthMin no. 1 sa pinakataas nga kaso sa teenage pregnancy sa Pilipinas

Numero uno na karon ang Northern Mindanao sa adunay pinakataas nga kaso sa teenage pregnancy sa tibuok rehiyon sa Pilipinas.

Gikompirma ni Commission on Population Northern Mindanao Regional Director Neil Aldrin Omega nga muabot sa 10.9% ang incident sa teenage pregnancy sa rehiyon basi sa national demographic and health survey nga gihimo niadtong tuig 2022.

Madumduman nga mudagan sa 10,311 ka mga kaso sa teenage pregnancy ang natala niadtong 2021, diin sa nahisgutang ihap muabot sa 30 ka batan-on ang gapanganak matag adlaw, gikan sa edad nga 10 ngadto sa 19-anyos.

Mas naka-alarma niini ang pagtaas sa kaso sa mga batan-on edad 10 ngadto sa 14-anyos nga nanganak nga gikan sa 117 ka kaso sa 2022, misaka pa kini sa 220 sa tuig 2021.

Daghan matud pa ang mga hinungdan nga nakahatag kontribusyon sa padayon nga pagsaka sa mga batan-on nga nanga-mabdos og sayo, ug pinaka-una niini mao ang pamilya kung asa dili andam ang ginikanan sa pagdumala sa paghatag giya sa mga bata kalabot sa sexuality issues.

Subo sab ang nahisgutan ahensya sa kawad-on sa presensya sa mga ginikanan sa gimugna nga programa aron matudluan ang mga ginikanan kung unsaon paggiya sa mga bata kalabot niini nga isyu ubos sa learning package on parent education on adolescent health and development.

Photo courtesy: PNA