Teenage pregnancy dako og kontribusyon sa stunting rate!

Dako og kontribusyon ang teenage pregnancy sa mga kaso sa stunted nga bata sa Pilipinas, kini ang gibutyag ni Commission on Population Northern Mindanao Regional Director Neil Aldrin Omega.

Gipasabot niini nga ang adolescent mothers, sila ang dunay taas nga risgo sa premature labor ug komplikasyon atol sa pagmabdos ug bisan mahuman sa pagpanganak nga muresulta sa taas nga morbidity ug morality.

Ang mga batan-on nga inahan, edad 14-anyos paubos ang kasagaran makabaton sa anak nga mga underweight, ug sagad ang ilang bata dili maka-antos hangtod nga musangko gayud sa kamatayon.

Sa data, dinhe sa Northern Mindanao nagpabilin nga taas ang stunting rate, diin sukad niadtong 2019 miabot kini sa 8.8%, sa 2020 anaa sa 7.6% ug 2021 anaa sa 6.4%.

Luyo matud pa nga ubos ang trend sa stunting rate makonsidera gihapon kini nga taas sigun pa ni Director Omega.

Gidugang niini nga ang mga undernourished nga mga bata, mao sab ang mga bata nga hinay ug huyang ang ilang performance sa klase nga maka-apekto sa ilang kaugmaon.

Kini sab ang hinungdan nganong duna pay mahimong kontribusyon sa isyu sa kalisod, malnutrisyon dinhe sa Pilipinas.