Nagdangat sa 1,534 nga mga botante ang nakaparehistro na sa bug-os nga probinsya sang Capiz sa una nga semana sang “Register Anywhere Project” ukon RAP nga ginatanyag sang Comelec.
Ini ang ginpahayag ni Atty. Will Arceño, Provincial Election Supervisor sang ma-interview sang Brigada News FM Roxas City.
Suno kay Arceño, ang Roxas City ang may pinakamadamo nga nagparehistro nga mga botante kun sa diin naglab-ot sa 400.
Ginasundan ini sang banwa sang Tapaz nga may yara sang 155 nga nagparehistro; Dumarao – 99; Dao – 97; Dumalag – 94; Pontevedra – 88; Mambusao – 87; Pres. Roxas – 77; Pilar – 75; Sigma – 71; Jamindan – 55; Sapian – 54; Panay – 48; Panitan – 47; Maayon – 32; Ivisan – 28 kag Cuartero – 27.
Lakip na sa nasambit nga numero ang mga nagpa-reactivate sang ila status, transfer registration, updating of voter information kag madamo sang iban pa.
Ginklaro ni Arceño, nga dapat personal gid nga magpadulong sa talatapan sang Comelec sa kada kabanwahan ang mga luyag magparehistro bangud ginakuhaan sang biometrics kag importante gid ang perma.
Magdala lamang sang valid ID, Barangay Clearance kag picture.
Nahibaluan nga nagsugod ang “Register Anywhere Project” ukon RAP sadtong Pebrero 12 kag magadugay ini tubtob Setyembre 30, 2024. | Judy Ann Juare