Dead on arrival sa ospital ang isa ka online seller samtang pilason naman ang live-in partner sini matapos maaksidente ang ginasakyan nila nga motorsiklo sa Sitio Perara, Brgy. Poblacion, Sapian, Capiz takna alas 11:50 kagab-i sang Lunes, Pebrero 19.
Ginkilala ang napatay kay Jean Naviamos, 32-anyos kag pilason naman si Reymond Boñales, 39-anyos, poultry technician, lunsay mga residente sang Sitio Manlalao, Brgy. Dapdapan sang nasambit nga banwa.
Sandig sa imbestigasyon sang Sapian Municipal Police Station, samtang ginasubay sang mag-live in partner ang dalan nagikan sa Brgy. Maninang kag pauli na kuntani sa ila puluy-an, apang pag-abot sa lugar kun sa diin natabo ang aksidente hinali lang may nagtabok nga layaw nga ido.
Bangud sini, nadulaan sang kontrol sa pagmaneho si Boñales rason sang ila pagkatumba.
Nag-angkon sang kapilasan sa kalawasan si Boñales samtang pilas sa ulo naman ang naangkon ni Naviamos.
Madasig ang mga ini nga ginpadangat sang Sapian MDRRMC sa Mambusao District Hospital agud madapatan sang nagakaigo nga pagbulong apang si Naviamos ang wala na matabangan pa. Sa karon, padayon ang imbestigasyon sang kapulisan sa nasambit nga aksidente. | Judy Ann Juare