Ginkalipay ni City Councilor Rey Magallanes matapos gin-aprubahan sang Sangguniang Panlungsod ang iya ginaduso nga ordinansa nga pagahimuon nalang nga isa ka adlaw ang coding sang mga tricycle sa syudad sang Roxas kada semana.
Matandaan sadtong kasagsagan sang pandemic, ginhimo nga duha ka adlaw ang coding bangud man sa pagsunod sa pila ka mga protocol nga ginapatuman.
Sa interview sang Brigada News FM Roxas City kay Magallanes, iya ginpahayag nga naghinyo sa City Council ang mga tricycle drivers and operators nga kun mahimo ibalik na ang 1 day coding kada semana agud madugangan ang ila income kag madamo man sang nagareklamo nga kulang ang mga traysikol nga nagabyahe gani ila ini nga ginhatagan sang pagtamod.
Suno kay Magallanes, wala sang pagbag-o sa penalidad nga mahimo bayaran sang mga nagalapas.
Coding day:
Lunes – tricycle nga may last digit nga 1 and 2 ginabawalan magbyahe
Martes – tricycle nga may last digit nga 3 and 4 ginabawalan magbyahe
Miyerkules – tricycle nga may last digit nga 5 and 6 ginabawalan magbyahe
Huwebes – tricycle nga may last digit nga 7 and 8 ginabawalan magbyahe
Biyernes – tricycle nga may last digit nga 9 and 0 ginabawalan magbyahe
Pag-abot sang Sabado, Dominggo kag Holiday ginapahanugutan ang tanan nga mga tricycle nga magbyahe.
Nagapasalamat naman si Magallanes sa iya mga kaupod sa City Council sa pagsuporta sa iya ginaduso nga ordinansa agud makabulig sa komunidad. | Judy Ann Juare