Gibana-banaang makakolekta ang lokal nga panggamhanan ning dakbayan sa Davao og P32 million gikan sa amusement tax sa higayon nga mahimo nang legal ang online sabong sa syudad.
Atol sa sesyon sa milabayng semana gibutyag ni City Councilor Danilo Dayanghirang, committee chairperson sa games and amusement sa 19th Davao city council, ang projected tax collection gikan sa online sabong base sa proposed P250 amusement tax collection matag sultada round sa sabong matag tuig.
Dugang niini nga kung kaniadto maka-kolekta ang syudad ug 10% per ticket sa panahon nga wala pay pandemya ug wala pa gibawal ang sabong, apan karong panahona nga wala nay entrance fees, mo-kolekta sila ug P250 matag sultada bugti sa 10-percent amusement tax.
Apan nabalaka si City Treasurer’s Office (CTO) representative Mary Emilou Limpot, sa mamahimo unya niining implikasyon sa hisgutanang administratibo partikular na sa determinasyon ug sa pagsubay sa mga resibo gikan sa mga patad tungod kay electronic man kini hinungdan nga maglisud sa collection sa taxes base sa original draft sa proposed ordinance.
Gipaniguro usab sa komitiba nga nagsudo sa balaudnon nga anaa sa duha ka ordinansa ang ihihay alang sa lokal ug national application.
Hinoon irekomenda usab matud pa sa konsehal ang pagpalig-on sa duha ka mga ordinansa nga gilangkuban sa paghatag ug pagtugot sa live broadcast ug data streamed cockfighting activities ug derbies operation sulod sa dakbayan sa dabaw ug ang pagtugot sa e-sabong pinaagi sa pag-amyenda sa mipatigbabaw nga probisyon sa cockfighting code sa syudad.