CEBU- Kapin sa P32 milyones nga balor sa drugas ang nasakmit sa Police Regional Office sa Central Visayas (PRO-7), gikan sa duha ka managlahi nga operasyon sa rehiyon niadtong Martes sa gabii, Pebrero 27.
Sa taho nga gipagawas sa kapulisan, nikabat sa 4,030 gramos sa shabu nga mobalor og P27.4 milyones ang nasakmit sa buy-bust operation sa Provincial Intelligence Unit sa Bohol Police Provincial Office sa Purok 7, Barangay Mansasa, Dakbayan sa Tagbilaran, diin napusasan ang mag live-in partner nga sila alyas “Johny” 24 anyos ug alyas “Mary”19 anyos, mga residente sa Barangay Bool, sa maong siyudad.
Samtang sa operasyon sa City Intelligence Unit sa Cebu City Police Office (CCPO), usa ka alyas “Mike” 29 anyos, residente sa Brgy. Gutlang, Lungsod sa Argao, ang malampuson sab nga nasikop sa dalan Villalon Drive, Barangay Capitol Site, Siyudad sa Sugbo. Nakuha gikan sa maong suspek ang 705 gramong shabu nga nibalor ngadto sa P4.7 milyones.//