LAOMAN na sa dili madugay nga madeklarar na nga African Swine Fever-free ang Cagayan de Oro ilabina nga anaa na kini karon sa recovery stage.
Pamahayag ni Acting City Veterinarian Dr. Lucien Anthony Acac nga mipailawom na sa orientation alang sa Swine Sentinel Program ang walo ka mga barangay nga gipasiugdahan sa Department of Agriculture (DA) uban sa City Veterinary Office.
Mao kini ang Barangay Mambuaya, San Simon, Baikingon, Indahag, Macasandig, Agusan, Puerto, ug Tablon diin hatagan og baboy ingon man libre nga feeds ang mga farmers nga naigo sa ASF.
Dugang ni Dr. Acac nga ang swine sentinel program mao ang paghatag og test pigs ngadto sa mga apektadong hog raisers gikan sa mga barangay nga naigo sa ASF aron masuta kon anaa o wala na ang presensiya sa ASF virus.
Samtang gipasalig ni Dr. Acac nga inisyal pa lamang ang walo ka mga barangay nga mahatagan og test pigs nga gikatakdang ipatuman sa unang quarter sa sunod tuig. – END – (ARNIEL)