LEGAZPI CITY – Iwo-work out ngunyan na taon kan National Irrigation Administration (NIA) Bicol an pagbubugtak nin solar pump.
Segun kay NIA Bicol Regional Manager Gaudencio De Vera sa intrevista kan Brigada News FM Legazpi, dipisil kaya i-sustain an mga pumps na naggagamit nin kuryente o kaya krudo huli ta nagmamahal naman an presyo.
May dakula man su boot na pondo para sa solar pump na magigin dakulang katabangan sa gabos huli ta long term ini kumpara sa ibang mga pump.
Sinabi ni De Vera, posibleng mapunan an pagbugtak kaini sa Abril o sa Mayo, pag naani na kan mga paraoma an saindang mga pananom.
Dakol su boot an matatabangan kaini, huli ta may target sindang 2,000 ektarya nin rainfed areas o an mga lugar na wara nin irigasyon asin nakakatanom sana pag nag-uuran.
Dugang pa niya, pag natawanan nin solar pumps an mga rainfed areas, pwedesir na duwang beses pa makatanom sa sarong taon an mga paraoma.