LEGAZPI CITY – Posible nang magpuon an Public Safety Office (PSO) Daraga, Albay sa pagdakop kan mga driver kan Daraga-Cumadcad na jeep na imbwelto sa illegal parking asin illegal terminal sa Brgy. Ilawod sa banwaan sa masunod na semana.
Sa intrevista kan Brigada News FM Legazpi kay Lorenzo Bañas kan nasambit na opisina, sinabi niya na sa kusog ini kan sarong municipal ordinance na posible nindang iluwas sa masunod na semana katuwang an MENRO.
Katakod ini sa reklamo ki sarong concerned citizen, na nakaabot na sa Mayor’s Office, na piggagaramit komo terminal o parkingan nin jeep an sarong residential site duman na maikokonsiderar na illegal.
Segun kay Bañas, an saro sa mga rason kun nata ini rineklamo, pwedesir makadanyar sa kaligtasan asin seguridad ki mga aki asin mga gurang an pagparking duman asin paggamit komo terminal orog na ta residential site ito kung sain igwa nin mga nagruruluwas na tawo hale sa saindang mga harong.
Nakakaperwisyo man su boot an ribok na hale sa mga lunadan asin may mga tawo man na nag-iihi sa nagkapirang parte kan lugar na nagtatao ki bako maray na parong na nakakaapektar man sa mga nakaistar harani duman.
Apwera kaini, kadakol man na mga basurang dai pigtatapok sa tamang lugar.
Klaro su boot na an siring na problema, nakakaapektar sa mga residente pag-abot sa saindang kaligtasan asin salud.
Sinabi ni Bañas, oras na maibaba na an ordinansa, sasampolan asin dadarakupon na ninda an mga driver na imbwelto digdi na dai nasasabihan dawa pirang beses nang winarningan.
Mientrastanto, napag-olayan naman su boot ninda ini sa meeting asin ngunyan pighahalat an desisyon kan Daraga-Anislag asin Daraga-Relocation jeep kun pwedesir i-transfer muna paramientras an 55 units kan Daraga-Cumadcad.