LEGAZPI CITY – Pigrekomendar kan Albay Provincial Veterinary Office sa Sangguniang Panlalawigan na magdeklarar ki state of calamity durante sa naglalangkaw na kaso kan rabies.
Paliwanag ni Provincial Veterinarian Dr. Pancho Mella, nagdadakol liwat an kaso nin rabies sa probinsya, kun sain puon kan 2013 sundo kan nakalihis na taon, igwa nin labi 20 kaso sa Albay asin hababa an numero kan mga nababakunahang ayam basado sa record kan mga lokal na gobyerno asin mga barangay na nasa 40% sana.
Apwera pa kaini, igwa na nin anom na human casualties puon kan bulan nin Enero sundo Marso 2024, kun sain duwa digdi an hale sa Tiwi asin Pio Duran, mantang tigsaro sa Jovellar asin Bacacay.
Mientrastanto, an nasambit na rekomendasyon, kwinestiyon kan nagkapirang mga board members, kun sain segun kay BM Atty. Melissa Abadeza asin BM Victor Ziga, ini an kaenot-enoteng pagkakataon na marekomendar an Veterinary Office na isairarom sa state of calamity ang probinsya.
Piggagamit sana kaya su boot ini kun may mga lugar na apektado kan mga kalamidad siring kan bagyo, pati naman linog, asin iba pa.
Apwera pa kaini, an pagdeklarar su boot ki state of calamity dapat igwa nin rekomendasyon hale sa Disaster Risk Reduction and Management Office asin may mga proseso pang aagihan antes ining ideklarar.