Sangka manami segun nga development para sa isla it Boracay ro naging tikang ag desisyon ni Aklan Governor Joen Miraflores nga haeugaan eon ro mga guidelines sa pagsueod it mga turista ag bakasyunista sa isla.
Sa interview it BRIGADA NEWS FM KALIBO kay Malay SB Member Alan Palma Sr., para makaangkon segun it sustainable tourism indi kinhangean nga maging kampante pirme.
Kinhangean man nga mag assess ag mag evaluate kung napapabilin ro demand it mga lokal ag foreign tourists eabi pa ag dikara nagabuoe sa tourism industry it income para sa pondong ginatao para sa social services.
Kaangot man sa pilang reklamo nga bukon it tourist friendly ro pilang staff sa Caticlan Jetty Port, nag suggest eon segun sanda sa Aklan Provincial Government nga mag hire it sangka tawo nga may kaaeaman sa hospitality management sa kung paano mag tratar it mayad sa mga bisita.
Dapat segun kay SB Palma nga unahon ro ginatawag nga human infrastructure bangud ro unang nagaatubang sa mga turista hay mga Aklanon, ag kung bukon it manami ro pagtratar sa bisita, maga-reflect raya sa brand of personality it mga Aklanon.
Ginhayag man ni SB Palma nga bangud ro Boracay hay sangka multi-awarded tourist destination, dapat competitive ro isla ag mag apply man it mga makabag ong sistema kaparehu it unified ticket sa Jetty Port.
Matandaan nga ginpatigayun ro 2nd BORACAY-CATICLAN SUSTAINABLE DEVELOPMENT COUNCIL (BCSDC) Council Meeting para maistoryahan ro mga pagahimuon nga tikang agud mapanami ro serbisyo sa pagsueod it mga turista ag bisita sa Boracay. // ANN DESLENE SALAZAR