Pagpapakusog kan koordinasyon kan kapulisan sa komunidad asin mga namamanwaan, sentro kan ika-26 na taong celebracion kan Police-Community Relations Month

BICOL – PUSOG na koordinasyon  sa komunidad asin pagmantiner kan  kompyansa  kan  publiko sa mga kapulisan.

Ini an  plano ngunyan na pakusugon  pa kan  National Police Commission o NAPOLCOM-Bicol kasabay kan  pormal na pagpupuon  kan selebrasyon kan  26^th Police-Community Relations Month.

Segun ki  NAPOLCOM Masbate Provincial Director Atty. Zalman Uddin, obheto kan selebrasyon ngunyan na     taon na mairani an  kapulisan sa mga komunidad tanganing mamatean  an saindang  serbisyo asin makatuwang an mga ini  sa pagkamit kan panghaluyan na katoninongan. 

Parte soboot kan nakalinyadang   aktibidad an pagsasagibo kan  webinars dapit sa stress management para sa mga police personnel nin huli  ta aram kan  komisyon na saro man sinda  sa mga nangangaipo nin  suporta tanganing  makapag cope-up ngunyan na panahon nin pandemya.

Mantang  ipinahayag man  ni Police Major Malu Calubaquib, tagapagtaram kan  PNP-Bicol dai ninda kukunsintihon   an bako maray na  gawi kan saindang pag iriba  asin siciertuhon na mapapanimbag  an mapapatunayan na   nagkasala.

Nagpapadahos man soboot an  mga lakdang tanganing mamantiner an  katrangkiluhan asin  kalinigan  kan  mga istasyon nin  pulisya sa rehiyon base  sa “Internal Cleaning  Policy” ni PNP Chief Eleazar.

Tema kan  PCR month celebration ngunyan na  taon iyo  an  “Pulisya at Pamayanan BARANGAYanihan sa Hamon ng Pandemya at Laban sa Krimen.”