Pagpapatalsik kay Parlade sa NTF-ELCAC, pwedeng daanin sa legal remedy- Roque

Pwede umanong daanin sa legal remedy ang pagnanais ng ilang personalidad na patalsikin si Lieutenant General Antonio Parlade Jr. sa  National Task Force on Ending Local Communist Armed Conflict (NTF-ELCAC). 

Ayon kay presidential spokesperson Harry Roque, pwedeng magsampa ng quo warranto petition laban kay Parlade, spokesperson ng NTF-ELCAC at commander ng Southern Luzon Command.

Aminado ang kalihim na  subject sa debate ang isyu tungkol sa kontrobersyal na opisyal.

Mababatid na nanawagan ang ilang mga senador na tanggalin na si Parlade bilang spokesperson ng NTF-ELCAC dahil sa constitutional ban sa mga active military officers mula sa pagkakaroon ng civilian post.

Kung matatandaan, binuo at pinamumunuan ni Pangulong Rodrigo Duterte ang NTF-ELCAC. 

Una nang sinabi ni Roque na ipinauubaya na sa nasabing task force kung paparusahan si Parlade dahil sa mga hakbang nito particular ang pag-uugnay nya sa mga organizers ng community pantry sa mga komunistang rebelde.