Mas matutukan na karon ang mga lugar nga makonsidera isip election hotspot areas sa umaabot nga 2022 National and Local Election homan himuon nang barangay level ang pagtumbok niini.
Gibutyag ni Police Regional Office 10 Spokesperson Police Lieutenant Colonel Michelle Olaivar nga katuyuan sa maong kausaban nga ma-plastar ug ma-prayoridad ang deployment sa otoridad sa mga hotspot area.
Kahibaloan nga dinhe sa Northern Mindanao, dunay 21 ka syudad ug lungsod nga girekomenda nga ibutang sa areas of concern basi sa gihatag nga kategorya sa Commission on Elections, ug posibli nga musaka ang maong ihap tungod ipa-agi na kini sa barangay level.
Giklaro sab ni Lt. Col. Olaivar nga sa pagsaka sa ihap sa election hotspot walay angay kabalak-an tungod pagtumbok lamang kini aron ma-andam ang deployment sa PNP ug Armed Forces of the Philippines.
Subay niini, sa pakighinabi sa Brigada News FM CDO kang COMELEC-Northern Mindanao Regional Election Director Atty. Francisco Pobe gibutyag niini nga karong umaabot nga Marso 18, i-anunsyo sa ilang buhatan ang mga lugar nga nalakip sa areas of concern aron sab nga masayod ang katawhan.
Dugang ni Atty. Pobe nga kadaghan sa mga lugar nga girekomenda isip election hotspot area, anaa lamang nabutang sa ubos nga klasipikasyon, gawas lamang sa red category nga gikan sa lalawigan sa Misamis Occidental. -END- (Claudine)