NAGA CITY – Humigit kumulang 15 armado na pinaghihinalaang mga miyembro ng rebeldeng New People’s Army ang nakasagupaan ng mga sundalo ng 83 Infantry Batalion, Phil Army kaninang ala 1:40 ng madaling araw sa Barangay Binalay, Tinambac, Camarines Sur.
Sa inisyal na ulat na inilabas ng Division Public Affairs Office ng 9th Infantry Division, Phil Army sa pamamagitan ni Army Capt. Frank Roldan, nagkakaroon ng combat operation ang mga sundalo ng masalubong ang naturang mga armadong grupo, ilang minuto ring nagkaroon ng putukan hanggang sa tumakas ang mga ito.
Aniya’y may mga dugo sa palibot ng pinangyarihan ng insidente, na posibleng may sugatan sa mga rebeldeng tumakas.
Nakuha sa lugar ay mga baril at bala gaya ng isang M16 Rifle, isang Cal. 45 pistol anim na pirasong magazines para sa 5.56mm, isang pirasong magazine sa Cal. 45 pistol, cellphone, mga gamit pampasabog at mga dokumento.
Kasalukuyang nagkakaroon pa ng imbestigasyon sa lugar ,inaalam pa ang iba pang detalye ng naturang engkuwentro.