BICOL—Naglabas ng travel guidelines ang Provincial Local Government Unit of Catanduanes para sa mga APOR o Authorized Person’s Outside Residence na papasok sa islang lalawigan.
Batay sa Memorandum Order No. 139 series of 2021, tatlong mga dokumento lamang ang kinakailangang i-presenta ng mga APOR at kabilang dito ang Valid Travel o Mission Order; Company ID at Date of Return.
Ang mga APOR na magmumula sa mga National Government Agencies ay exempted o hindi na kinakailangan pang mag presenta o magpakita ng negatibong resulta ng RT PCR Test. Samantala, ang mga APOR namang walang kumpletong dokumento tulad ng mga paunang sinabi ay ikukunsidera bilang Locally Stranded Individuals o LSI at required ang mga itong magpakita ng negatibong COVID-19 test result gayundin ang mga APOR na hindi magmumula sa anumang ahensiya ng pamahalaan.
Ang naturang polisiya ay alinsunod sa IATF-MEID Omnibus Guidelines na ipinapayong ipasunod ng bawat lokal na pamahalaan lalo na ang mga probinsiya na may mataas na kaso NG COVID-19.
Kahapon, araw ng Martes ay 20 panibagong kaso ng sakit ang naitala sa islang probinsiya kung saan 11 sa mga ito ang mula sa kabiserang bayan ng Virac; tig-tatlo ang mga bayan ng Caramoran at San Andres; dalawa sa Baras habang isa naman sa bayan ng Bato.###