Panawagan sa pagpapanatili sa schedule ng coding sa mga tricyle sa lungsod ng Cauayan, paguusapan sa konseho

Bukas na pag-usapan ng Cauayan City Council at Public Office Safety Division ang panawagan ng mga tsuper ng lungsod na panatilihin ang schedule ng number coding scheme. 

Sa naging panayam ng 92.9 Brigada News FM Cauayan kay Cauayan City Councilor Telesforo “Porong” Mallilin, Committee on Transportation, pabor siya sa hindi na pagpapapalit ng schedule ng coding ng mga traysikel sa lungsod.

Ayon kay SP Mallillin, mas maganda umano ito upang hindi na magkaroon ng kalituhan ang mga tsuper sa kanilang schedule sa pamamasada.

Bukod dito, swertehan lang naman umano ang pamamasada kung saan kaakibat  nito ang pagiging madiskarte at pagdo-doble kayod.

Taliwas naman ito kay POSD Chief Pilarito “Pitok” Mallillin dahil lugi umano ang mga traysikel na nagtatapos sa even numbers.

Ito ay dahil ang mga traysikel na nagtatapos ang kanilang body number sa odd numbers ay saklaw nito ang Office Days kung saan marami umano ang pasahero. 

Habang ang mga odd even numbers naman ay matumal at patay umano ang kanilang kita sa araw ng kanilang schedule.

Ayon pa kay POSD Chief Mallilin, mas maganda umanong ipagpatuloy ang rotational schedule ng coding sa lunsod para sa maayos na kalakaran sa pamamasada. 

Matatandaan na ilang beses nang pinalitan ang schedule ng number coding scheme sa lungsod dahil sa mga pagpapatupad ng iba’t-ibang community quarantine status.

Samantala, magkakaroon naman ng pagpupulong kaugnay dito sa araw ng Biyernes ang lahat ng mga TODA sa lungsod katuwang ang Cauayan City Council at ang POSD.