PASPAS nga imbestigasyon sa kamatay’ng nahitabo ang mandu sa labaw sa kapulisan sa GenSan sa iyang mga sakop. Gihimo ni PCol. Gilberto Tuzon, director sa GenSan City Police Office (GSCPO) dungan sa pagpatawag og ‘emergency’ conference.
Matud ni Tuzon, tumong sa mandu ang mahatagan og hustisya ang pamilya’ng nawad-an og kinabuhi tungod sa pagpamusil. Lakip sa mandu niini ang pagpakusog sa ‘intelligence’ monitoring batok motorcycle riding intandem criminals.
Apil ang paglig-on sa ilang visibility ug mobile patrol sa nagkadaiyang bahin sa dakbayan. Kahibaloan nga karong bulana lang misaka na sa upat katao ang gipusil-patay sa GenSan. Lakip sa napatay ang executive officer director sa Brigada Group of Companies ug executive sa security agency nga subsidiary sa kompanya.
Samtang gikan Enero hangtud karong bulana misaka na sa 23 katao ang gipusil patay asa ang labing ulahi mao ang usa ka Michael Pagaduan nga kanhi piniriso nga bag-ong gawas atong Mayo 3 sa City Jail. ( Richel Gubalani)