Nagpaabot it andang protest letter ro pamunuan it Philippine Association of Social Workers – Aklan chapter, kontra sa restaurant sa Malinao, Aklan nga nag post it andang Valentine’s promo nga ginasugid nga pagtapak sa pagkatawo it mga kababaihan.
Base sa sueat it PASWI nga ginpadaea kay Malinao Mayor Josephine Iquiña, dismayado sanda sa promotion it restaurant nga “bastos” ag offensive para sa mga babaye.
Ro PASWI nga sambilog sa naga sueong sa gender equality and women empowerment, hay nagapati nga dapat i-promote ro equality, respect ag dignidad it mga kababaihan.
Ro Valentine promo segun it nasambit nga restaurant sa Malinao, hay naga salungat sa prinsipyo it inclusivity ag pagrespeto nga dapat itaguyod it anumang establisyemento.
Bangud kara, umapela ro PASWI-Aklan it insigidang aksyon sa andang ginpadaea nga protest letter kay Mayor Iquiña.
Bisan pa segun nag post it apology ro management it restaurant, indi gihapon kara matadlong ro anumang saea nga andang naubra.
Suno sa PASWI, raya hay katumbas it pagbawi it andang lisensya sa pag-operate bangud sobra nanda nga gin-eapas ro dignidad it kababaihan, eabi eon ro mga kababaihan sa Malinao. // ANN DESLENE SALAZAR