Patay na nga nakaplagan ang usa ka lalaki ilalom sa tulay sa Purok Pagkakaisa 1, Lower Kapayas, Barangay Matiao, Mati City pasado alas 4:20 kagahapon sa kadlawon.
Giila sa otoridad ang maong patay’ng lawas nga mao si Victorino Doceo Mejos, 47 anyos, minyo, Bus Driver ug residente sa Purok Maunawain, Daticor, sa nahisgutang Barangay.
Base sa inisyal nga imbestigasyon sa Mati PNP, pasado alas 4:10 kagahapon sa kadlawon, napalgan sa usa ka Dodong Cadayona, residente sa lugar ang maong lalaki nga adunay samad sa ulo nga bahin.
Ayha pa napalgan ang biktima, pasado alas 8 sa gabii sa milabay’ng adlaw, hangtud pasado alas 2 sa kadlawon, nag-inom matud pa kini ug nag selebrar pa sa ilang reunion kauban ang iyang mga barkada sa covered court sa Barangay hall sa Barangay Matiao human nibiya sa lugar.
Sa kasamtangan, padayon pa ang gihimong imbestigasyon sa mga otoridad aron masuta ang hinungdan sa inisdente.