MALAY, AKLAN—Umapela do Philippine Chamber of Commerce and Industry Boracay (PCCI-Boracay) kanday Aklan Governor Florencio Miraflores ag Malay acting Mayor Frolibar Bautista nga patag-uron do curfew hours ag bue-on do liquor ban sa isla it Boracay.
Base sa andang ginpadaeang sueat, ginrekomenda nanda nga bue-on do liquor ban sa mga DOT accredited hotels nga may authority to operate ag mga compliant restaurants ag bars nga may Municipality of Malay’s Certificate to Operate.
Do mga nasambit sigon nga establisimentong hay may una nga certificate maghalin sa gobyerno bilang pamatuod nga nagasunod ru mga raya sa safety health standard protocols.
Mag-eowas kara, ginrekomenda man it mga stakeholders do pagpatag-od it curfew hours sa Boracay umpisa ala-1:00 ng aga-aga hasta it alas-4:00 it aga-aga bangud nga do mga nagaagto sigon sa isla hay gusto nga magliwaliw ag do pagpatuman it bag-ong curfew hour hay magaresulta it pagsangkiri it mga bisita nga magaagto sa Boracay.
Kung madumduman, sandig sa ginpaguwa nga Executive Order 005-C ni Governor Miraflores, ginabawae do pagbaligya it aeak ag pag-operate it mga bars sa Aklan ag do curfew hours sa banwa it Malay hay alas-10 it gabii hasta it alas-5 sa agahon. // SHERRY ANNE REUNIR-VIDAL