KALIBO, AKLAN—Temporaryo nga ginpasara do Office of the Municipal Mayor, Municipal Planning and Development Office ag Human Resource Management Office sa munisipyo it Kalibo.
Raya hay matapos an-om nga empleyado sa taeatapan it alkalde do nagpositibo sa deadly virus ag tig-sambilog nga empleyado man sa nasambit nga daywang opisina.
Sandig sa abiso nga ginpaguwa ni Kalibo Mayor Emerson Lachica, ginrekomenda it Municipal IATF do nasambit nga tikang agud nga makapatigayon it maid-id nga disinfection, contact tracing ag containment measure.
Kaangot kara, do Office of the Municipal Mayor hay magapadayon man sigon do pagbaton it internal ag essential transactions nga nagakinahangean it insigida nga aksyon agud nga indi maapektuhan do vital operations it LGU.
Samtang, ginaeauman nga magapaguwa it Executive Order si Mayor Lachica makarun nga adlaw kaangot sa bag-ong oras it curfew hour ag iba pang patakaran sa makaalarmang sitwayon it COVID-19 sa kabisera it Aklan. // SHERRY ANNE REUNIR-VIDAL