LEGAZPI CITY – Liwat na nakapagrehistro nin panibagong kaso nin pagkagadan durante kan rabies an Rural Health Unit (RHU) kan Pio Duran, Albay.
Sa intrevista kan Brigada News FM Legazpi kay Pio Duran Municipal Health Officer Dr. Edward Hernandez, kinumpirmar kaini na sarong 9 anyos na aking lalaki an biktima na residente kan Brgy. Sto. Cristo kan banwaan.
Segun kay Hernandez, napag-araman na Setyembre 2023 pa nakagat nin ayam an biktima asin kan Miyerkules sana na-admit sa Pio Duran Memorial District Hospital alas 7 nin banggi, dangan pig-refer sa Bicol Regional Hospital and Medical Center, alagad binawian nin buhay kasuudmang alas 5 nin maagahon.
Mientrastanto, padagos an pigsasagibong imbestigasyon kan opisina orog na ta nakaresibe sindang impormasyon na buhay pa an ayam na nakakagat.
Katakod kaini, nagkondusir naman ki household contact tracing nganing mabakunahan an mga na-expose asin maibitaran an paglakop kan mga kaso.
Sa ngunyan, pigpoproblema kan opisina an pagpabalik kan bangkay kan biktima sa banwaan asin pigrekomendar an tulos na pagpalubong kaini, alagad wara pa nin desisyon an pamilya.