GI-RAID sa otoridad ang usa ka plantasyon sa marijuana sa utlanan sa Malungon, Sarangani Province ug Kiblawan, Davao Del Sur, Miyerkoles. Sa operasyon, nalarot sa kapulisan ang P2.3 milyon nga tanum nga marijuana lakip ang pinaugang dahon niini nga ideliber na unta.
Matud ni Police Lt.Col. Jovenson Bayona, hepe sa Malungon Municipal Police Station, nakadawat sila og impormasyon nga dunay tanum nga marijuana sa giilogang luna sa Sitio Kelil Datal, Barangay Datal Batong, Malungon ug Sitio Nuket, Barangay Bulol Salo, Kiblawan.
Didto nila giadtoan kauban ang Regional Drug Enforcement Unit (RPDEU), Philippine Drug Enforcement Group (PDEG) ug 73th Infantry Battalion (IB), Philippine Army. Ang maong mga tanum nga marijuana ang gitanum sumala pa sa mga bandido ug ginabaligya. Wala may nasikop nga indibidwal sa maong operasyon apan giangkon sa opisyal nga duna na silay pangalan sa mga nasangpit ug kini ang ilang pasakaan og kaso sa piskalya.
Aron usab matago ang dagko nga tanum sa marijuana gisagolan kini og ubang tanum aron dili mahalata. I Richel Gubalani
–