LEGAZPI CITY – Pormal nang nagpoon an plenary session kan nagkapirang bise gobernador sa nasyon katakod kan 96th National Assembly kan League of the Vice Governors of the Philippines (LVGP) sa sarong hotel sa syudad nin Legazpi.
Obheto kan pag-orolay na matutukan an manlain-laing mga sektor asin komunidad siring kan mga paraoma, parasira, indigenous people, informal settlers asin iba pa.
Sinabi ni Lagnuna Vice Governor Katherine Agapay, kinakaogma niya an pagtanggap ni Albay Vice Governor Glenda Bongao sa sainda para sa nasambit na assembly asin namatean niya su boot an pag-welcome kan mga Albayano.
Segun man kay Ilocos Norte Vice Governor Cecilia Araneta-Marcos, oportunidad ini tanganing magkasararo, magpakusugan asin mapag-olayan an mga resolusyon kan kada probinsiya.
Nasambit man niya na maogma sinda sa nagin eksperyensiya sa enot na paglibot sa manlain-lain na lugar asin nag-enjoy man sa ATV, zip line asin an pagtanaw sa Bulkan Mayon.
Mientrastanto, madurar hasta sa Marso 2 an pagtenir kan mga opisyales asin iba pang bisita sa siyudad. | Brigada Intern FRANKLIN BANAYO