LEGAZPI CITY – Mas huminababa ngunyan na taon an presyo kan nagkapirang mga paputok kun ikukumpara sa nakalihis na taon 2022.
Ini an sinabi kan nagkapirang mga paratinda nin paputok sa may parte kan Sawangan Park sa syudad nin Legazpi.
Segun sainda, nasa PHP5-10 an binaba sa presyo kan mga ini.
Saro sa mga rason digdi, hababa man an itinaong presyo kan mga supplier ninda asin limitado sana an mga ginaramit na chemicals sa produksyon.
Mientrastanto, duwang aldaw antes mag-Pasko kan nakalihis na semana, maluya asin matumal pa an mga nagbabarakal nin paputok.
Alagad, an pinakapiglalaoman talaga kan lambang paratinda, sa Disyembre 31 magkakaigwa ki dakol na mga parabakal.