LEGAZPI CITY – Sarong taon na an nakalihis puon kan nangyari an Cessna Plane 340A crash tragedy sa banwaan kan Camalig, Albay.
Nangyari an insidente kan Pebrero 18 kan nakalihis na taon na nagresulta sa pagkagadan kan apat na personang lunad kaini kaibahan an sarong piloto asin mekaniko na binistong sinda Capt. Rufino James Crisostomo, pati man sinda Simon Chipperfield asin Karthi Santhanamkan, mga Australian passengers.
Katakod kaini, pigkomemorar kasudma kan lokal na gobyerno kan banwaan katuwang an gobyerno-probinsyal kan Albay an enot na anibersaryo kan insidente sa paagi nin pagkondusir ki memorial mass asin halipot na programa partikularmente sa Brgy. Anoling kun sain nakua an mga parte kan eroplano asin an mga bangkay sa may slope kan Bulkan Mayon.
Apwera kaini, kasabay kan pagrumdom sa plane crash incident, an Energy Development Corporation (EDC), nagkondusir man ki tree-planting activity nganing protehiran asin ipahiling an pagmamakulog sa kapalibutan.
Kun babalikan, pasado 6:00 nin pagkaaga kan Pebrero 18, 2023 kan huminali an eroplano sa Bicol International Airport, alagad makalihis an pirang minuto nawaran na nin contact digdi, kaya inalerto na kan mga otoridad an gabos na mga MDRRMO asin nadiskobre an wreckage sa dalisdis kan Mayon harani na sa mga crater kaini.
Uminabot sa 13 aldaw an nagin search, rescue, asin retrieval operation na pinagtarabangan kan mga personahes hale sa manlain-laing ahensya kan gobyerno, mountaineers, asin iba pang mga volunteers.