Kulong eon makarun sa Makato MPS ro suspek nga nadakpan it baril sa Brgy. Baybay, Makato, Aklan ku Setyembre 16 bandang alas 10:30 it gabii.
Ginkilaea ro suspek nga si Jason Dalida y Tabios, 43 yo, prison guard it ARC Nalook, Kalibo, ag residente it Brgy. Alibagon, Makato, Aklan.
Sa report, sangka concerned citizen ro nagpaabot nga may sangka hilong nga nagpa eupok it anang baril it daywang beses.
Insigida man nga rumesponde ro mga tawuhan it Makato MPS, ag pag abot sa lugar hay nakita ro suspek nga hilong ag naga pungko sa binit it karsada ag nakabutang ro baril sa likod it konkretong pungkuan sa anang iping.
Sa pag-verify it nasambit nga baril, raya hay sangka cal 38 nga may an-um nga gabot ag may SW markings sa bueoytan, kargado it ap-at nga live ammunition ag daywang basiyo it bala.
Posible man nga magapangatubang ro suspek sa kasong pag eabag sa RA 10591 in relation to Comelec Gun Ban. // ANN DESLENE SALAZAR