LEGAZPI CITY – May pahayag na an saro sa mga barangay kagawad kan Brgy. Rawis, syudad nin Legazpi mapadapit sa reklamong nareresibe gikan sa mga residente na an tinampo sa may Purok 1, Talisay Street, Brgy. Pagasa, Legazpi City an pirming pigbabaha asin pigdudugi.
Sa intrevista kan Brigada News FM Legazpi kay Kagawad Alex Toledo Deocancil, sinabi kaini na igwang piggigibong aksyon an saindang barangay orog na an saindang kapitan mapadapit sa problemang ini alagad pighahalat pa an proseso kan pondo.
Segun kay Deocancil, mabugtak sinda ki sadit na line canal sa gilid nganing igwa nin pag-aagihan an tubig.
Iyo su boot ini an nahihiling nindang solusyon ngunyan nganing mapugulan an pagbaha sa lugar, orog na ngunyan na parani na an tag-init na pwedesir makaapektar sa salud lalo na sa mga kaakian.
Tinawan-doon pa ni Deocancil na an kawsa man sana kan problemang ini, iyo an kawaran ki disiplina kan nagkapirang mga residente, kun sain dakol an mga nagpapabulos ki tubig na hale sa banyo, maski an mga ati nin hayop irituon man duman.
Mientrastanto, pigsiyerto ni Deocancil na mapupunan na an pagbugtak nin line canal ngunyan o sa sunod na semana.