KALIBO, AKLAN—Ginmandu ni Police Colonel Ramir Perlito Perlas, provincial director it Aklan Police Provincial Office sa mga police units do pagbawae sa welcome reception ukon hazing practices.
Raya hay kasunod it natabo nga insidente sa 2nd Aklan Provincial Mobile Force Company sa Buruanga, Aklan kung siin gin-akusahan it pagpanakit it bagitong pulis nga si Patrolman Rommel Magsusi do limang pulis nga sanday Patrolman Christian Solanoy, Patrolman Ruel Cuales, Patrolman Ritchel Tolentino, Corporal Richie Lustica ag Corporal Roque Lurca.
Nauna eon nga ginpahayag ni Col. Perlas nga indi nanda pagkunsintihon do nasambit nga sahi it “initiation rites” ag magapatigayon it impartial ag maid-id nga imbestigasyon do Aklan PPO investigation unit angot kara.
Samtang apisar nga nakaabot eon sigon do hitabo sa National Police Commission (NAPOLCOM), kinahangean gihapon it complainant nga magsumite sa APPO fact-finding investigation team it medical certificate ag sworn statement it mga witnesses agud nga mapamatud-an do anang akusasyon.
Nasayuran nga si Magsusi hay una makarun sa administrative custody it Aklan PPO para sa andang kaeowasan ag do limang pulis nga ginareklamo hay ginsaylo anay sa 1st Aklan Provincial Mobile Force Company sa may Barangay Rosal, Libacao, Aklan samtang nagapadayon do imbestigasyon. // SHERRY ANNE REUNIR-VIDAL