LEGAZPI CITY – Ngunyan na paparani an Kapaskuhan, dakol na naman an mga nagtitinda nin mga Christmas lights and decorations sa malls asin sa merkado.
Huli kaini, nagpatanid an Department of Trade and Industry (DTI) Bicol sa publiko orog na sa mga mabarakal ki mga Christmas lights.
Sa intrevista kan Brigada News FM Legazpi kay DTI Bicol Consumer Protection Division Chief Ruben Sombon, sinabi niya na pirmi hilingon kun igwa ini nin PS mark o ICC sticker.
An PS mark pigbubugtak su boot para sa mga local manufacturers kan Christmas lights, mantang an ICC sticker para duman sa mga importers.
An marka o stickers na ini an mga basehan sa kaligtasan asin kalidad kan produkto segun kay Sombon kun sain boot sabihon, an mga produkto uminagi sa mga testing asin inspeksyon.
Pangapodan ni Sombon sa publiko na magin vigilant ngunyan sa pagbakal kan siring na produkto nganing maibetaran an pagkakaigwa nin dai piglalaomang mga insidente.