LEGAZPI CITY – Pigsiyerto kan Public Safety Office (PSO) Daraga na pigagibuhan na ninda nin aksyon an mga nareresibe nindang mga reklamo hale sa publiko na kontra sa nagkapira nindang mga personahes.
Sa intrevista kan Brigada News FM Legazpi kay PSO Daraga PIO Luel Marcellana, sinabi niya na an lambang aksyon digdi, pinangengenotan ni PSO Chief Vicente Naira.
Segun saiya, an gabos nindang mga personahe, pigtataraman nganing mas magin maray an paggibo ninda kan saindang mga trabaho.
Apwera digdi, padagos man su boot an saindang pagtabang asin pagtukdo sa mga personahe nganing mas madugangan pa an mga kaaraman orog na pag-abot sa traffic management.
Mientrastanto, katakod kaini, kan nakalihis na semana, nagkondusir naman sinda nin panel interview sa mga datihan nang PSO personnels magin sa mga aplikante ngunyan asin awera kaini, magkakaigwa man sinda nin internal cleansing kun sain ieebalwar an nagin mga performance kan mga personahe.